2Ti 4 | NdeIBE | STEP | Phambi kukaNkulunkulu loKhristu uJesu, ozakwahlulela abaphilayo labafileyo, njalo mayelana lokubonakala kwakhe kanye lombuso wakhe, ngikunika umlayo lo:

2 Timothy 4

1 Phambi kukaNkulunkulu loKhristu uJesu, ozakwahlulela abaphilayo labafileyo, njalo mayelana lokubonakala kwakhe kanye lombuso wakhe, ngikunika umlayo lo: 2 Tshumayela iLizwi; lungisela ngesikhathi esifaneleyo langesikhathi esingafanelanga; lungisa, ukhuze njalo ukhuthaze – ngokubekezelela okukhulu langokulaya ngokunanzelela. 3 Ngoba isikhathi sizafika lapho abantu abangayikuyivuma imfundiso eqotho. Kodwa, ukuze basuthise izinkanuko zabo, bazaziqoqela abafundisi abanengi ukuba batsho lokho izindlebe zabo ezilumayo ezifuna ukukuzwa. 4 Izindlebe zabo bazazisusa eqinisweni baphambukele ezinganekwaneni. 5 Kodwa wena chuma kuzo zonke izehlakalo, ubekezele ebunzimeni, wenze umsebenzi womvangeli, uyifeze yonke imisebenzi yenkonzo yakho. 6 Ngoba mina sengilungele ukwenziwa umnikelo, njalo lesikhathi sokusuka kwami sesifikile. 7 Ngilwile ukulwa okuhle, umjaho wami sengiwuqedile, ukukholwa ngikulondolozile. 8 Khathesi ngigcinelwe umqhele wokulunga, iNkosi, uMahluleli olungileyo, ezanginika wona ngalelolanga – njalo kungayisimi kuphela, kodwa bonke futhi abatshisekela ukubonakala kwayo.

Amazwi aqondene laye

9 Zama ngamandla akho wonke ukuba uze kimi ngokuphangisa, 10 ngoba uDemasi, ngenxa yokuthi ubethanda umhlaba lo, usengibalekele waya eThesalonika. UKhrisensi useye eGalathiya, uThithusi waya eDalimathiya. 11 ULukha nguye kuphela olami. Thatha uMakho uze laye, ngoba ulusizo kimi enkonzweni yami. 12 UThikhikhusi ngamthuma e-Efesu. 13 Lapho ususiza, uze lejazi engalitshiya kuKhaphusi eTrowa, lemiqulu yami ikakhulu eyezikhumba. 14 U-Elekizanda umkhandi wensimbi wenza okubi kakhulu kimi. INkosi izaphindisela kuye lokhu akwenzileyo. 15 Lawe futhi kumele umqaphele, ngoba ilizwi lethu waliphikisa kakhulu. 16 Ekuzivikeleni kwami kwakuqala, kakho owazangisekela, kodwa abantu bonke bangibalekela. Kabangabi lamlandu walokho. 17 Kodwa iNkosi yema phansi kwami yangipha amandla, ukuze kuthi ngami ilizwi litshunyayelwe ngokupheleleyo njalo kuthi labezizweni bonke balizwe. Njalo ngakhutshwa emlonyeni wesilwane. 18 INkosi izangihlenga kukho konke ukuhlaselwa okubi, ingilethe kungekho bubi embusweni wayo wasezulwini. Udumo kalube kuyo kuze kube nini lanini. Ameni.

Ukuvalelisa

19 Bingelela uPhrisila lo-Akhwila kanye labendlu ka-Onesiforu. 20 U-Erastu wasala eKhorinte, kwathi uThirofimu ngamtshiya egula eMiletu. 21 Zama ngamandla akho wonke ukuba ufike lapha ubusika bungakafiki. UYubhulu uyakubingelela, uyakubingelela loPhudeni, loLinu, loKlawudiya kanye labazalwane bonke. 22 INkosi kayibe lomoya wakho. Umusa kawube lawe.